“Bir Peşənin Sirri” festivalı Heydər Əliyev Seyrəngahında Peşə Təhsili üzrə Dövlət Agentliyi və Cəlilabad Dövlət Peşə Təhsil Mərkəzinin birgə təşkilatçılığı, Lənkəran-Astara Regional Təhsil İdarəsinin dəstəyi ilə keçirilib.

Festivalın açılış mərasimi rəsmilərin çıxışları ilə başlayıb. Çıxışlar zamanı peşə təhsilinin ölkənin iqtisadi inkişafındakı strateji rolundan, gənclərin məşğulluq imkanlarının artırılması və peşə təhsilinə olan marağın yüksəldilməsi istiqamətində həyata keçirilən tədbirlərdən bəhs olunub.

Festivalda qonaqlara Bakı, Cəlilabad, Neftçala, Salyan, Şirvan və Biləsuvarda yerləşən peşə təhsili müəssisələrinin turizm, mədəniyyət, sənaye, kənd təsərrüfatı, İKT və ictimai iaşə istiqamətlərində təhsil alan tələbələrinin əl işlərindən ibarət sərgilər, ustad dərsləri və müxtəlif fəaliyyətlər həyata keçirilib. Festivalda həmçinin region üzrə peşə təmayüllü siniflərin şagirdlərinin də əl işlərindən ibarət sərgi nümayiş etdirilib. Bununla yanaşı tədbir iştirakçıları üçün əyləncəli oyunlar, viktorinalar keçirilib. Peşə təhsil müəssisələri tərəfindən keçirilən yarışların qalibləri dəyərli hədiyyələrlə mükafatlandırılıb. Həmçinin tədbir iştirakçıları müxtəlif peşələrin sirri ilə bağlı maraqlı məlumatlar əldə ediblər.

Qeyd edək ki, tədbirin keçirilməsində əsas məqsəd peşə təhsilinin əhatə dairəsini daha da genişləndirmək, gənclərin, valideynlərin o cümlədən bütün maraqlı tərəflərin bu prosesə cəlb edilməsini təmin etməkdir.

#LənkəranAstaraRTİ #PeşəTəhsiliÜzrəDövlətAgentliyi #CəlilabadDövlətPeşəTəhsilMərkəzi #Cəlilabad